Siphakeme .Mnindwa
Mthabisi Tshuma
UMCULI weGospel uMai Mwamuka uqale umnyaka kakuhle nanko ingoma yakhe ayikhipha nyakenye ethi Dwala Lami isivuthisa inkundla zomculo emsakazweni.
Ingoma le iphume ikunombolo yesibili kumncintiswano we-2024 Skyz Metro FM Hot 100.
Ingoma le wayicula eleqembu le-Vocal Ex njalo yaphuma kuvesi leBhayibhili ku-Psalms 18:1-3 ekhuluma ngokuthi uNkulunkulu lidwala lomuntu wonke osebunzimeni ngakho kumele adunyiswe ngaso sonke isikhathi.
Ngemva kokuqhuba umcimbi wengoma zokholo, owe-Worship Well mhlaka 28 Mpalakazi nyakenye, uMai Mwamuka ubike ukuba uzasungula kakutsha mhlaka 12 Mbimbitho koBulawayo.
Ekhuluma lentatheli yephephandaba likazulu kuliviki, uMai Mwamuka uthe uyajabula ngosekelo alutholayo ngomnyaka odluleyo. Uthembise okunengi lonyaka.
“Ngithobekile ngosekelo lwabantu bakoBulawayo. Babeyisimangaliso. Sibonga wonke umuntu owasisesekalayo ngomnyaka odluleyo. Siyayithokozela iSkyz Metro FM ngokuvezwa lethuba abasinikeze lona njalo asikuthathi kalula abasenzele khona.
“Lesi yisipho esihle somnyaka omutsha kuqembu likaMai Mwamuka njalo siyababonga abame lathi ukuqinisekisa ukuthi yonke imicimbi yethu iba yimpumelelo, sengathi uNkulunkulu ababusise. Abalandeli kumele balindele inhlelo ezintsha,” kutsho uMai Mwamuka.
Uthe lonyaka bazaqinela ekuthini bakhulise umcimbi we-Worship Well uqhele ufinyelele emzini yabantu, laseziqintini ezisemaphandleni, ezibhedlela, emitshadweni, ePhalamende lakwezinye indawo.
“Impendulo esiyithola kubalandeli bethu iyamangalisa. Abantu bayawuthanda umsebenzi wethu. Imibono yabo mihle kakhulu enkundleni zokuxhumana. Kubonisa ukuthi abantu baxhumene loNkulunkulu ngohlelo lwethu lwe-Worship Well.
“Sikhuthaza abantu ukuthi baqhubeke lokuxhumana lathi futhi sisenhlelweni zokwenza okunye okuzahlabusa enhliziyweni zabalandeli. NgoMbimbitho sizakuba lomhlangano wokuqala weWorship Well kaNkulunkulu ngo-2025,” kutsho uMai Mwamuka.
